Татарстан Икътисад министрлыгы үзмәшульләрнең иң популяр эшчәнлек өлкәләрен атады
Исемлеккә кондитерлар һәм маникюр осталары эләкмәгән.
(Казан, 12 декабрь, «Татар-информ», Розалия Хәйруллина). Үзмәшгуль гражданнарның күпчелеге пассажирлар һәм йөк ташу, ремонт эшләре, консультация һәм арендага торак бирү өлкәләрендә эшли. Бу хакта «Татар-информ» мәгълүмат агентлыгы хәбәрчесенә Татарстан Икътисад министрлыгы матбугат хезмәтендә сөйләделәр.
«Татарстанда үзмәшгульләрнең иң популяр өлкәләре пассажирлар һәм йөк ташу, ремонт эшләре, консультация бирү һәм арендага торак бирү. Шулай ук алар репетиторлык, программалаштыру, маркетинг һәм реклама белән шөгыльләнә», — дип билгеләп үттеләр ведомствоның матбугат хезмәтендә.
«Татар-информ» мәгълүмат агентлыгы хәбәр иткәнчә, Татарстанда шәхси эшмәкәрләрнең үзмәшгуль категориясенә күчүе күзәтелә.