Азык-төлеккә бәяләр арту 40 ел эчендә беренче тапкыр рекордлы дәрәҗәгә җитте

Эксперт фикеренчә, бу төрле азык-төлек бәяләренең үзара бәйләнеше аркасында килеп чыга.

(Казан, 6 октябрь, «Татар-информ»). Азык-төлеккә дөньядагы бәяләр индексы бер елда 27 процентка артты, бу 40 ел эчендәге иң динамик күрсәткечләрнең берсе булды.

INFOLine мәгълүмати-аналитика агентлыгы генераль директоры Иван Федяков белдергәнчә, бу төрле азык-төлек бәяләренең үзара бәйләнеше аркасында килеп чыга.

«Яшелчә, җиләк-җимеш, сөт бәясе генә кыйммәтләнеп калмый, ә терлек азыгы, ашлама бәяләре дә арта», — дип яза белгеч сүзләренә сылтама белән РИА Новости.

Аналитик белдергәнчә, сатып алучанлык сәләте чиксез түгел, шуңа күрә кайчан да булса бәяләр арту чик дәрәҗәгә җитәчәк.