Бүген Рөстәм Миңнеханов Япония һәм Төркия компанияләре вәкилләре белән очраша
Төркия компаниясе Татарстанда табаклы һәм автомобиль пыяласы эшләп чыгару буенча зур инвестицион проект гамәлгә ашырган.
(Казан, 3 декабрь, «Татар-информ»). Татарстан Президенты Рөстәм Миңнеханов ТР Хөкүмәте йортында Япониянең JFR Co һәм Syngen Biotech компанияләре җитәкчеләрен, шулай ук Төркиянең Sisecam компаниясе башлыгын кабул итәчәк. Очрашу барышында бизнес-проектлар хакында фикер алышу күздә тотыла. Бу хакта «Татар-информ» агентлыгына ТР Президентының матбугат хезмәтеннән хәбәр иттеләр.
Төркия компаниясе 2016 елда «Алабуга» махсус икътисади зонасында табаклы һәм автомобиль пыяласы эшләп чыгару буенча ике завод ачты. Әңгәмә барышында төрек инвесторы республика Президентына предприятиенең агымдагы эшчәнлеге һәм җитештерүне үстерү перспективалары хакында сөйләячәк.
Казан Кремленең рәсми вәкиле Лилия Галимова искәртеп үткәнчә, Япония компаниясе вәкилләре әлегә республика территориясендә бизнес-проектлар гамәлгә ашырмаган.
«Компания пробиотиклар эшләп чыгару белән шөгыльләнә. Очрашу барышында Япония компаниясе эшләп чыгарыла торган продукция буенча үз мөмкинлекләрен тәкъдим итәр дип көтелә», - дип билгеләп үтте Лилия Галимова.