Татарстан Кырымнан мидия һәм устрицалар китерүне җайга салырга тели

Ярымутрауның балык хуҗалыклары пандемия аркасында катлаулы хәлдә калган.

(Казан, 2 июнь, «Татар-информ»). Татарстан һәм Россиянең кайбер төбәкләре Кырымнан мидия һәм устрицалар кертә башларга мөмкин. Бу хакта РБК-Татарстан хәбәр итә.

Кырым авыл хуҗалыгы министры Андрей Рюмшин ярымутраудагы балык хуҗалыкларының Россиянең кайбер төбәкләренә (Татарстанны да кертеп) диңгез продуктларын сатарга әзер икәнлеген белдерде.

«2020 елда Кырымнан Мәскәү, Санкт-Петербург, Ярославль, Ростов-Дон, Владимир өлкәсе, Краснодар крае, шулай ук Самара, Ижевск һәм Татарстанга 200 тоннадан артык мидия һәм устрица китерү күздә тотыла», - диде Рюмшин.

Казан һәм Татарстан Рестораторлар һәм отельерлар ассоциациясе рәисе Зөфәр Гаязов республикада Кырым балык хуҗалыклары продукциясенә ихтыяҗ булачагын искәртте. Әмма ул пандемия башланганчы кайсы рестораннарда кунакларга ярымутраудан китерелгән диңгез продуктлары тәкъдим ителүен белми.