Россиядә салым акчаларын кайтару тәртибе гадиләштереләчәк

Акчаны исәпләү һәм кире кайтаруга хокук булуны тикшерү сроклары ике тапкырдан күбрәккә - дүрт айдан ай ярымга кадәр кыскарачак.

(Казан, 1 май, «Татар-информ»). Россиядә яшәүчеләр 21 майдан НДФЛ буенча мөлкәт һәм инвестицион түләүләрне Федераль салым хезмәте сайтында шәхси кабинет аша гадиләштерелгән тәртиптә рәсмиләштерү мөмкинлеге алачак. Бу законны 20 апрельдә Россия Президенты Владимир Путин имзалады.

Хәзер гражданнарга чыгымнар буенча түләүләр алу өчен салым декларациясен тутырырга һәм торак сатып алу һәм ипотека буенча процентларны каплау, шулай ук шәхси инвестиция счетында исәпкә алына торган операцияләр раслый торган документларны җыярга туры килмәячәк. Бу турыда РИА Новости хәбәр итә.

Барлык кирәкле мәгълүматны салым хезмәте банклардан алачак, алар мондый алмашуга ирекле тәртиптә кушыла алачак. Финанс оешмалары программасында катнашучылар исемлеге Федераль салым хезмәте сайтындагы махсус бүлектә актуальләштереләчәк.

Моннан тыш, акчаны исәпләү һәм кире кайтаруга хокук булуны тикшерү сроклары ике тапкырдан күбрәккә — дүрт айдан ай ярымга кадәр кыскарачак. Салым түләүләрен кайтару хокукы булган очракта, Федераль салым хезмәте аны раслау өчен шәхси кабинетка гариза җибәрә. Салым түләүчеләр бу документны имзалаганнан соң, салым кире кайтарылганчыга кадәр процессны күзәтә алачак.