Бүген Казанда Барда районының 100 еллыгына багышланган тамаша уза
Бүген, 22 ноябрьдә Казан шәһәренең В.И. Ленин исемендәге мәдәни-ял комплексында Барда районы җирлегенең 100 еллыгына багышланган «Саумы, Казан – рухи башкала!» дип аталган зур концерт уза. Чара кунакларын Бөтендөнья татар конгрессы Башкарма комитеты җитәкчесе Данис Шакиров сәламләде. Бу хакта Конгресс матбугат хезмәте хәбәр итә.
«Бергә булыйк, бердәм булыйк. Алга таба да татар дөньясын гөрләтеп яшәргә язсын. Сез безгә кирәк, сез безгә терәк!» – диде ул.
Алга таба Данис Шакиров милләтебез алдындагы олы хезмәтләрен искә алып, татар халкының телен, мәдәниятен үстерүдә, гореф-гадәтләрен саклап калуда башкарган зур эшләре өчен мактаулы шәхесләргә Бөтендөнья татар конгрессының Рәхмәт хатын тапшырды.
Концертта Татарстанның атказанган артистлары Чулпан Йосыпова, Айгөл Хәйри, Сәнифә Рангулова, Татарстанның атказанган мәдәният хезмәткәре Динара Фәхриева, хореография сәнгате буенча Халыкара фестивальләр һәм конкурслар җиңүчесе Эльвина Туйгульдина, Алсу Имайкина һәм башкалар чыгыш ясый.
Шулай ук фойеда күргәзмә дә оештырылган. Биредә Барда түбәтәе, Барда чәкчәге кебек әлеге районга гына хас әйберләр күрсәтелгән.