Буада сигезенче мәхәллә мәчетенә ай куелды
Авыл халкын мәчетнең хәзергә хәтле эшләнгән һәм алга таба эшләнәчәк эш планнары белән таныштырдылар.
(Казан, 5 июль, «Татар-информ»). 2 июль көнне Буада яңа төзелеп килә торган мәчеткә ай кую тантанасы булды. Бу хакта Татарстан мөселманнары Диния нәзарәте матбугат хезмәте хәбәр итә.
Тантана барышында мәчет имамы Шамил хәзрәт Вәлиуллин җыелган халыкка, мәчеткә һәрдаим ярдәм итүчеләргә үзенең рәхмәтләрен җиткерде.
Мәчетнең салынуында башыннан алып ярдәм күрсәтүче Зөфәр Фатыйх улы халыкка мәчетнең хәзергә хәтле эшләнгән, алга таба эшләнәчәк эш планнары белән таныштырып үтте. Җыелган халык ай куйган вакытта тәкбирләр әйтеп торды. Соңыннан Шамил хәзрәт мәчетнең киләчәктә дәвамлыгы булсын диеп догалар кылып тәмамлады.
