Буада өлкәннәр берләшмәсе оештырганнар
Алар татар халык җырларын күпләп өйрәнгәннәр, республика конкурсларында катнашырга ниятлиләр.
(Буа, 28 сентябрь, "Татар-информ", "Байрак"). Буа районы мәдәният бүлеге системасында хезмәт куйган өлкәннәр берләште. Алар "Буа моңнары” оешмасы дип аталачак. Бу турыда район басмасы хәбәр итә..
"Безне моңа беркем дә чакырмады, үзебезнең шулай, аралашып, нәрсәгә дә булса файдалы булып яшисебез килде",- ди берләшмә активы Гөлчәчәк Кәлимуллина.
Өлкәннәр район тормышында тирән эз калдырган коллегаларына багышлап кичәләр оештыралар, истәлекләр белән уртаклашалар.Татар халык җырларын күпләп өйрәнгәннәр, республика конкурсларында катнашырга ниятлиләр.
Ветераннар районда эшләп килүче “Ак калфак” берләшмәсе белән дә хезмәттәшлек итәргә әзер. Боларны башкару, атна саен очрашып алга таба планнар төзү өчен бина кирәк аларга. Берләшмә әгъзалары үзләре янына өлкән яшьтәге һәркемне сыйдыруларын әйтәләр. Әлегә вакытлыча иганәче тәгъдим иткән бинада җыелалар.