Буада Идел буе һәм Урал театрлары көнүзәк проблемалар турында фикер алышачак
Конференция «Идел-Буа-Урал – диалог киңлекләре» фестивале барышында үтәчәк.
(Казан, 11 март, «Татар-информ»). 12 марттан 23 енә кадәр Буада Идел буе һәм Урал халык театрларының «Идел-Буа-Урал – диалог киңлекләре» I Бөтенроссия фестивале уза. Оештыручыларның хәбәр итүенчә, фестиваль 30 мең кешелек шәһәрдә узуы белән үзенчәлекле.
Тәнкыйтьчеләр коллегиясендә театр сәнгате өлкәсендә танылган экспертлар: Александр Вислов һәм Анна Банасюкевич (Мәскәү), Динә Дәүләтшина (Уфа), Олеся Кренская (Ульяновск) һәм Нияз Игъламов (Казан) бар.
Фестиваль 12 мартта Буа драма театрында ачыла. Кунаклар исемлегендә Татарстан мәдният министры Айрат Сибагатуллин, Буа муниципаль районы башкарма комитеты җитәкчесе Сәлим Даутов, Татарстан финанс министры Радик Гайзатуллин, шагыйрь Ренат Харис, шулай ук предприятие һәм оешма җитәкчеләре бар.
19 мартта 15 сәгатьтә «Идел буе һәм Урал театрлары актуаль проблемалары» темасына конференция узачак.
Шул көнне 17.00 сәгатьтә Зөлфәт Хәким пьесасы буенча «Килә ява, килә ява» спектакле Россиянең атказанган сәнгать эшлеклелесе Фәрит Бикчәнтәев куелышында күрсәтеләчәк.