Икътисад 7 июнь 2010 12:22

Бу әле соңгы чик түгел

Республикада бензин бәяләре арта

Скопировать ссылку

(Казан, 7 июнь, “Татар-информ”, Роза Исмәгыйлова). Әле бер ай элек кенә республикадагы 92 номерлы бензинга уртача бәя 19 сум тәшкил итә иде. Бүген ул 21 сумнан алып 22 сум 10 тиенгәчә артты. Ләкин бу әле соңгы чик булмаска да мөмкин.
Мәгълүм булганча, узган атнада Дәүләт Думасында РФ Хакимияте башлыгы Владимир Путин катнашында булып узган утырышларның берсендә депутатлар халыктан җыеп алынучы салымнарны бензин бәясенә кертергә кирәк, дигән тәкъдим белән чыктылар. Алар фикеренчә, болай эшләгәндә хаклырак булачак. Автотранспорт чарасында кем йөрсә - салымны шул түләсен, ди алар. Болай эшләгәндә, ил казнасына төрле хәйләкәр юллар белән кермичә калган акча күләмен арттырырга мөмкин булачак, дип саный белгечләр. Бензин сатып алган саен, акча казнага күчеп барачак, димәк, түләмәүчеләрне эзләп тә, акча сорап та йөрергә туры килмәячәк. Дәүләт Думасы бу киңәшләрне истә тотып, яңалыкларны тормышка ашыра калса, машинасыз кибеткә дә йөрергә күнекмәгәннәргә бил каешларын ныграк кысарга туры килмәгәе.

Сәхифәләр

Бу әле соңгы чик түгел