Бу атнада Казанда Мәрҗани һәйкәле куелачак
Яңа төзелгән Мәрҗани скверын эшләп бетерү 10 ноябрьгә тәмамланыр дип көтелә.
(Казан, 22 октябрь, "Татар-информ", Алсу Исмәгыйлева). Бу атнада, һава торышы уңай торса, Казанда мәгърифәтче Шиһабетдин Мәрҗанигә һәйкәл урнаштырылып бетәчәк. Ул башкаланың Мәрҗани урамында, шул ук исемдәге мәчет янәшәсендә булачак. Бу хакта "Татар-информ"га ТР Премьер-министры урынбасары, Милли Шура рәисе Васил Шәйхразиев әйтте.
Бүген вице-премьер, һәйкәл куелу барышы белән танышу максатыннан, Казан хакимияте, министрлыклар, ТР мөселманнары Диния нәзарәте вәкилләре катнашында күчмә киңәшмә уздырган.
"Без Мәрҗани исемендәге сквер булдыру һәм аңа һәйкәл кую турында күптән хыялланып йөри идек. Казан хакимияте Мәрҗани мәчете янында, Кабан күле буенда зур гына урын бирде. Скверда инде зур эшләр эшләнгән. Һәйкәл әзерләнеп беткән. Хәзер постамент җыю бара. Бу атна азагына хәтле, әгәр безгә һава торышы мөмкинлек бирсә, без һәйкәлне постаментына урнаштырабыз", - диде Милли Шура рәисе.
Вице-премьер сүзләренә караганда, эшләр 10 ноябрьгә тәмамланыр дип көтелә. Һәйкәлне рәсми рәвештә ачу сквер һәм яр буенда эшләр тәмамланганнан соң планлаштырылачак. "Һәйкәлне ачу бәйрәм рәвешенә оештырылачак, аны татар-мөселман бәйрәмендә зурлап ачарга исәп", - диде ул.
- Татар мәгърифәтчесе, галим Ш.Мәрҗанинең 200 еллыгы республикада рәсми рәвештә игълан ителгән иде. Ел дәвамында бу уңайдан фәнни, дини һәм мәдәни чаралар узды. Васил Шәйхразиев чараларның ноябрь-декабрь айларында да, 2019 елда да дәвам итәчәген әйтте.