БРИКС саммиты вакытында Татарстан Милли китапханәсе ябылып торачак
БРИКС саммиты вакытында Татарстан Милли китапханәсен ябып торачаклар. Бу хакта китапханәнең «ВКонтакте» социаль челтәрендәге аккаунтында хәбәр итәләр.
«Әлеге уңайсызлыклар XVI БРИКС саммитына әзерлек һәм аны уздыруга бәйле иминлек чараларын арттыруны тәэмин итү аркасында килеп чыкты», – диелә хәбәрдә.
Китапханә 21-24 октябрь көннәрендә ябык була, бу көннәрдә китаплар алып һәм тапшырып булмаячак. Китапларны кире кайтару вакытын автомат рәвештә озайталар. 25 октябрьдән китапханә гадәти режимда эшли башлый.
Кичә БРИКС саммиты аркасында туристларның Казан Кирмәненә экскурсияләргә керә алмаячагы да билгеле булды. 17-23 октябрь көннәрендә экспозицияләрне карап булмый.
Уналтынчы БРИКС саммиты Татарстан башкаласында 22-24 октябрь көннәрендә узачак. Республика Рәисе Рөстәм Миңнеханов сүзләренчә, мондый дәрәҗәдәге чаралар уздыру республика өчен зур дәрәҗә һәм җаваплылык. 30дан артык дәүләт лидерлары саммитта катнашуны раслады.