Болгар музеенда тарихчылар, туган якны өйрәнүчеләр үз фәнни тикшеренүләрен тәкъдим итә
Әлеге чараны үткәрү тәҗрибә уртаклашырга, яңа идеяләр тәкъдим итәргә, фикер алышырга һәм тиешле карарлар кабул итәргә мөмкинлек бирә.
(Казан, 17 ноябрь, «Татар-информ»). 23 ноябрьдә Болгар музей-тыюлыгында узачак «Болгар музей-тыюлыгы – тарихи-мәдәни мирасны саклаучы» дип исемләнгән IV Төбәкара фәнни-гамәли конференциясендә катнашучылар фәнни-тикшеренү эшләрен тәкъдим итәчәк. Бу хакта ТР Мәдәният министрлыгы матбугат хезмәте хәбәр итә.
Әлеге чараны үткәрү үзара тәҗрибә уртаклашырга, яңа идеяләр тәкъдим итәргә, алар хакында фикер алышырга һәм тиешле карарлар кабул итәргә мөмкинлек бирәчәк.
Конференциядә археология һәйкәлләре, этнография һәм музей эшен өйрәнү белән шөгыльләнүче, тарих һәм мәдәни мирасны саклауга битараф булмаган кешеләр катнаша. Алар арасында галимнәр, аспирантлар, Болгар музей-тыюлыгы, ТР Фәннәр академиясенең А.Х.Халиков исемендәге Археология институты фәнни хезмәткәрләре, Татарстанның Кама аръягы муниципаль туган якны өйрәнү музейлары хезмәткәрләре һәм туган якны өйрәнүчеләр бар.
Конференция нәтиҗәләре буенча чарада ясалган чыгышлардан торган җыентык дөнья күрәчәк.