Дин 30 ноябрь 2018 13:05

Болгар ислам академиясендә мәгариф мәсьәләләрен хәл итәчәкләр

Мөселман мәгариф оешмалары мөгаллимнәренең VI Халыкара форумында дини белем бирү турында фикер алышачаклар.

Скопировать ссылку

(Казан, 30 ноябрь, "Татар-информ"). 5 декабрьдә Болгар ислам академиясендә мөселман мәгариф оешмалары мөгаллимнәренең VI Халыкара форумы ачыла. Быел ул Россия ислам институтының 20 еллыгына багышлана. Җыен ислам уку йортларында мәгариф өлкәсенә кагылышлы мәсьәләләрне хәл итү мәйданчыгы булачак һәм ике көн дәвам итәчәк. Бу хакта Татарстан Диния нәзарәтенең матбугат хезмәте хәбәр итә.

Форумның беренче көнендә мәчет каршындагы курсларда белем бирүче ике йөзгә якын мөгаллим мөселман мәгарифенең башлангыч сегменты турында фикер алышачак. Фәнни-гамәли чара өйләдән соң лекторлар чыгышлары белән дәвам иттереләчәк.

Фән һәм мәгариф белгечләренең “Мәчетләр каршында балаларның җәйге ялын оештыру: проблемалар һәм аларны чишү юллары”, “Мәчет каршындагы курсларда татар телен укытуның мөһимлеге һәм нәтиҗәләре”, “Мәчет каршындагы курсларда ислам фәннәрен укыту методикасы”, “Мәхәлләләрдә дин нигезләренә өйрәтү һәм дини тәрбия бирү” кебек темаларга чыгыш ясавы күздә тотыла.

Форумның икенче көне урта һәм югары дини уку йортлары җитәкчеләре, укытучылары катнашында Россия ислам институтында узачак. Анда республика һәм мөфтият җитәкчелеге, чит ил кунаклары катнашыр дип планлаштырыла. Бәйрәм тантанасында зур хөрмәткә лаек шәхесләрне бүләкләү, мактау сүзләрен җиткерү көтелә.

Искәртеп үтәргә кирәк: мөселман мәгариф оешмалары мөгаллимнәре форумы 2011 елдан бирле уздырыла. Чараны ТР мөселманнары Диния нәзарәте, Россия ислам институты, Казан федераль университеты һәм Болгар ислам академиясе белән берлектә оештыра.

#Болгар ислам академиясе #дин

Сәхифәләр

Болгар ислам академиясендә мәгариф мәсьәләләрен хәл итәчәкләр