Бөгелмәдә «Кәккүк чәе» этно-бәйрәме уздырылды
Бөгелмәнең Гашек урамындагы җәяүлеләр зонасында күңелле һәм күпмилләтле чара оештырылды. Бу хакта «Бөгелмә авазы» газетасы хәбәр итә.
Китапханә маркетингы бүлеге мөдире Елена Шәрипова сөйләвенчә, традиция буенча, җәй башында хатын-кызлар һәм балалар урманда яисә елга буенда җыелганнар. Алар эскәтерләр җәеп, хуш исле үләннәр белән чәй кайнатканнар, ботка пешергәннәр һәм кәккүкләрне сыйлау йоласын башкарганнар: кошлар сайраган агач тамырларына сөт һәм катык, йомыркалар салганнар, ә агач ботакларына кызыл тасмалар бәйләгәннәр.
Төрле елларда бу бәйрәм Бөгелмәнең төрле мәйданчыкларында: Соколка тавында, мәдәният һәм ял паркында, Ленин мәйданындагы скверда оештырылды. Быел исә чара икенче тапкыр шәһәр үзәгендәге сулыкның күркәм ярында узды.
Я. Гашек урамында халык күп иде: кунаклар милли уеннар уйнадылар, мастер-классларда һәм викториналарда катнаштылар, шулай ук агачларга төрле төстәге тасмалар бәйләп, теләкләр теләделәр. Туймазы районынан килгән иҗат коллективы исә кунаклар өчен башкорт халык җырларын башкарды, диелә хәбәрдә.