Бөгелмәдә «Ел укытучысы – 2025» бөтенроссия конкурсының муниципаль этабы узды
Бөгелмәдә «Ел укытучысы – 2025» бөтенроссия конкурсының муниципаль этабы узды. Җиңүчеләр Бөгелмә районын конкурсның зона этабында тәкъдим итәчәк. Бу хакта «Бөгелмә авазы» газетасы хәбәр итә.
Иң яхшы укытучы исеменә 9 педагог дәгъва иткән. Укытучылар арасында ярышлар ике номинациядә узган. Өч елга кадәр эш тәҗрибәсе булган педагоглар «Педагогик дебют» номинациясенә гариза биргән, ә аларның биш елдан күбрәк хезмәт стажы булган тәҗрибәлерәк хезмәттәшләре төп номинациядә ярышкан.
«Педагогик дебют«та 12нче номерлы төп гомуми белем бирү мәктәбенең башлангыч сыйныфлар укытучысы Луиза Кинзина, 3нче номерлы урта гомуми белем бирү мәктәбенең тарих укытучысы Диана Вилданова, 1нче номерлы урта гомуми белем бирү мәктәбенең башлангыч сыйныфлар укытучысы Ирина Конакова катнашкан.
Ел укытучысы исеме өчен 9нчы номерлы мәктәпнең информатика укытучысы Юлия Садыйкова, 14нче номерлы гимназиянең башлангыч сыйныфлар укытучысы Гөлназ Гыйниатуллина, 16нчы номерлы мәктәпнең математика укытучысы Анастасия Кобзева, Наратлы мәктәбенең география һәм чуваш теле укытучысы Марина Свежинкина, Карабаш 1нче номерлы мәктәбенең башлангыч сыйныфлар укытучысы Әлфия Камалетдинова һәм 2нче номерлы лицейның инглиз теле укытучысы Софья Потеряхина ярышкан.
Һәр катнашучы жюри һәм тамашачылар хөкеменә үз темасы буенча мастер-класс тәкъдим иткән. Педагоглар укытуда кулланган кызыклы эшләнмәләре белән уртаклашкан һәм жюри сорауларларына җавап биргән.
Конкурс сынаулары нәтиҗәсендә һәр номинациядә җиңүчеләр ачыкланган.
Дебютант педагоглар арасында беренче урынны Диана Вилданова яулаган. Икенче урында — Луиза Кинзина, өченче урында — Ирина Конакова.
«Ел укытучысы» номинациясендә Софья Потеряхина җиңүче дип танылган. Икенче урынны Анастасия Кобзева, өченче урынны Гөлназ Гыйниатуллина яулаган.