Бөгелмә балалары махсус хәрби операция зонасына җибәрү өчен токмач кисте
Бөгелмәдә «Ялкын» социаль приютында тәрбияләнүчеләр хәрби хезмәткәрләргә махсус хәрби операция зонасына җибәрү өчен токмач әзерләгән. Кызлар камыр басты, җәйде, токмач кисте, махсус хәрби операциядә катнашучыларга чын күңелдән сабырлык һәм сәламәтлек, шулай ук тизрәк өйгә кайтуларын теләделәр. Бу хакта «Бөгелмә авазы» хәбәр итә.
Киптерелгәннән соң, аны контейнерларга тутырдылар. Хәзер инде мәхәббәт белән эшләнгән бу токмач, сугышчыларга туган якларын искә төшереп, гуманитар конвой составында алгы сызыкка китәчәк.
«Балалар, өйдәге токмачтан ясалган шулпа якташларыбызга көч һәм оптимизм өстәр дип өметләнеп, бөтен күңел җылыларын, изге хисләрен салдылар», – диелгән хәбәрдә.