Биләрдә «Аулак өй - көрәш» төбәкара проектында финалга чыккан командалар көч сынаша
Быел февральдә укучылар арасында узган финал ярышларында җиңү яулаган финалист командалар - Татарстанның Балык Бистәсе Олы Елга урта мәктәбе һәм Чувашиянең Комсомол районы Урмай урта мәктәбе командалары «Сәләт»леләр өчен Габдулла Тукай иҗатына багышланган «Аулак өй - көрәш» төбәкара проектында көч сынашачак.
«Алар февральдә бәйгедә катнашып, «Сәләт» уку-укыту һәм сәламәтләндерү аланына юллама белән бүләкләнде. Бүген Биләрдә финалист командалар көч сынаша. Февральдә финалда исә әдәби бәйге өчен бергәләп Муса Җәлил иҗаты һәм Җәлилчеләрне өйрәндек», - диде «Татар-информ»га проектның җитәкчесе, Татарстан Журналистлар берлеге әгъзасы Сәрия Закирова.
Аның әйтүенчә, татар халкының йолаларын, гореф гадәтләрен өйрәнү, бергәләп татар әдәбияты классикларын уку максаты белән оешкан «Аулак өй - көрәш» проекты «Сәләт» яшьләр иҗтимагый фонды белән бергәләп хезмәттәшлек итү хакында килешкән. «Быел җәен әдәби көрәш «Сәләт» форумында һәм «Сәләт - Кама» аланында «Аргамак»та уза», - диде ул.
- «Аулак өй – көрәш» төбәкара проекты Татарстанның Мәгариф һәм фән, Мәдәният, Яшьләр эшләре министрлыклары, Татарстанның мәдәният ресурс үзәге, Бөтендөнья татар конгрессы, «Татмедиа» акционерлык җәмгыяте, ТРның Студентлары Лигасы, «Сәләт» яшьләр үзәге ярдәме белән гамәлгә куела.