Биектау районында шәхси йортта янгын сүндергәндә ир-ат мәетен тапканнар
Кичә Пермяк авылында кичке сәгать җиденчедә бүрәнәдән салынган йортка ут капкан.
(Казан, 16 сентябрь, «Татар-информ»). Биектау районында Пермяк авылында янгын сүндерүчеләр шәхси йортка капкан утны сүндергән һәм йортның өлкән яшьтәге хуҗасының мәетен тапканнар. Бу хакта «Татар-информ»га Россия Гадәттән тыш хәлләр министрлыгының Татарстан буенча Баш идарәсенең матбугат хезмәтендә хәбәр иттеләр.
Пермяк авылында кичә кичке сәгать җиденчедә агач йорт яна башлаган. Янгын сәбәбе электр приборларын дөрес кулланмау икәнлеге ачыкланган.
Янгын сүндерүчеләр йортта 78 яшьлек бабайның мәетен тапкан. Аның 75 яшьлек хатыны исән, аның бите бераз пешкән. Әби хастаханәгә барудан баш тарткан.
