Биектау районы Айбаш авылындагы тарихи мәчет манарасына ярымай куелды
Бүген, 18 февраль, Изге Рамазан ае алдыннан Татарстанның Биектау районы, Айбаш авылының төзекләндерелгән тарихи агач мәчет манарасына ярымай кую тантанасы узды.
Тантанада Татарстан мөфтиенең мөхтәсибәтләр белән эшләү буенча урынбасары Равил хәзрәт Зөфәров, Татарстанның мәдәни мирас объектларын саклау буенча комитет рәисе урынбасары Наталья Прохорова, Биектау районы башлыгы Равил Хисаметдинов, Биектау районы имам-мөхтәсибе Тәлгать хәзрәт Гайфуллин, имамнар, авыл халкы катнашты.
XX гасыр башында төзелгән мәчет ул чорның татар авыл архитектурасының уникаль үрнәге һәм төбәк әһәмиятендәге мәдәни мирас объекты булып санала, дип хәбәр итә Татарстанның мәдәни мирас объектларын саклау буенча комитет матбугат хезмәте.
Бина нарат бүрәнәләрдән төзелгән, аның архитектурасы Татарстанның авыл торак пунктларына хас булган агач төзелеш сәнгате үзенчәлекләрен чагылдыра. Совет чорында мәчетләр, ябылып, манаралары киселгән, әмма Айбаш авылындагы мәчет бинасы сакланып калган, ул кинокартиналар күрсәтү өчен клуб буларак файдаланылган.
Иван Гущин җитәкчелегендәге Татарстан мәдәни мирас объектларын саклау буенча комитет Татарстан Республикасы Рәисе Рөстәм Миңнеханов йөкләмәсе буенча республика дәүләт программасы кысаларында фәнни проект документларын эшләгән.
2023 елда мәчеттә Комитет күзәтчелегендә төзекләндерү-реставрация эшләре башланып киткән. Реставрация эшләренең күп өлеше Лаеш районының Сокуры авылында махсус базада алып барылган, аннан төзекләндерелгән корылмалар Айбашка кайтарылган. Эш барышында тарихи чынбарлыкны торгызу өчен, архив фотосурәтләре файдаланылган, экспертлар үз киңәшләрен биргән. Мәчетнең нигезе ныгытылган, бура, өслекләр, терәк корылмалар һәм түбә тулысынча реставрацияләнгән, яңа манара куелган, мәчет янында тәһарәтханә төзелгән.
«Дини корылмаларны реставрацияләү – тарих һәм халык алдында зур җаваплылык ул. Чөнки дин тотучылар өчен мәчет – Аллаһы Тәгаләгә якынаю, рухи чистарыну һәм эчке гармониягә ирешү урыны. 2023 елның маенда реставрация эшләренә керешкәндә, бина бик начар хәлдә иде. Төзекләндерү нәтиҗәсендә мәчет үзенең тарихилыгын да саклап калды, заманчалыгын да югалтмады. Без традицион технологияләр һәм материаллар гына кулландык», – диде бүген Наталья Прохорова.