Без – финалда, әмма бию азактан гына яхшы – Владимир Алекно
"Зенит" волейбол командасы баш тренеры "Белогорье" клубына каршы уенга үз бәясен бирде.
(Казан, 10 май, "Татар-информ"). Мәскәүдә Белгородның "Белогорье" командасын отып (3:0), Россия чемпионатында финалга чыкканнан соң, "Зенит"ның баш тренеры Владимир Алекно бүгенге уенга үз бәясен бирде.
"Көндәш команданың составта берникадәр үзгәрешләр ясавы безнең өчен сюрприз булды. Шул ук вакытта авырлык китермәде. Ә инде өченче партиядә "Белогорье" классик составта чыгыш ясаганда, аларның уены яхшырды. Ничек кенә булмасын, матчта киеренкелек бар иде. Андый матчларда минем максат – уенчыларга комачаулык тудырмау, ә үземнең дулкынлануны яшерү. Шул максатка ирешсәм, моны күреп, уенчылар да борчылмый, үз-үзләренә ышанычлары арта", – диде Владимир Алекно.
Казан командасы баш тренеры иң мөһим адымның әле ясалмаган булуын да яшерми.
"Хәзер без – финалда. Әмма бию азактан гына яхшы", – диде Алекно.