Беренче канал кубогына ярышта “Ак Барс” хоккейчысы Андрей Педан уйнаячак
Россиянең хоккей буенча җыелма командасы декабрьдә Швеция, Чехия, Финляндия җыелмалары белән көч сынашачак.
(Казан, 12 декабрь, “Татар-информ”). Мәскәүдә үтәчәк “Беренче канал кубогы”нда Россиянең хоккей буенча җыелма командасы составында “Ак Барс” уенчысы Андрей Педан да катнашачак. Әлеге кубок 13-16 декабрь көннәрендә Еврохоккейтур кысаларында оештырыла.
Россиянең хоккей буенча җыелмасы 13 декабрьдә Швеция, 15 декабрьдә Чехия, 16 декабрьдә Финляндия җыелма командалары белән уйный.
Уеннарның дүртесе Мәскәүнең “ЦСКА Арена” боз сараенда, ә икесе - чыгарылма уеннар, алар Тампере һәм Санкт-Петербург шәһәрләрендә үтәчәк.
“Беренче канал кубогы” унөч ел рәттән уздырыла. Иң күп җиңү Россия хоккейчылары исәбендә. Алар бу кубокны җиде тапкыр откан. Швеция һәм Чехия җыелмаларында ике җиңү, ә Финляндия җыелмасында бер генә җиңү исәпләнелә.