Белгеч Яңа ел бәйрәмнәрендә чыккан янгыннарның сәбәпләрен атады
Янгыннарның күбесе торак йортларда чыга.
(Казан, 22 декабрь, «Татар-информ», Гадел Әхмәтҗанов). Татарстан янгын күзәтчелеге буенча баш дәүләт инспекторы урынбасары Максим Трущин Яңа ел бәйрәмнәрендә чыккан янгыннарның төп сәбәпләрен атады. Бу турыда ул «Татар-информ»да узган матбугат очрашуында сөйләде.
«Ут белән саксыз эш итү, электр җиһазларын техник эксплуатацияләү кагыйдәләрен бозу һәм җылыту мичләренең ватык булуы — узган елда Яңа ел бәйрәмнәрендә чыккан янгыннарның төп сәбәпләре», — диде ул.
Максим Трущин әйтүенчә, янгыннарның күпчелеге торак йортларда чыккан. 15 янгынны исерек хәлдәге кешеләр чыгарган. Әлеге янгында 7 кеше вафат булган, 3се тән җәрәхәтләре алган.
Алданрак "Татар-информ" агентлыгы Татарстанда янгынга каршы махсус режим кертелүе турында язган иде.