Җәмгыять 6 октябрь 2024 11:21

Белгеч 2025 елда ял өчен иң отышлы айларны атады

Скопировать ссылку

2025 елның июль һәм октябрь айлары биш көнлек график буенча эшләүче россиялеләр өчен иң уңышлы отпуск айлары булачак. Бу хакта РИА Новостига «МТС Travel» сәяхәтләр сервисының коммуникацияләр буенча директоры Сергей Становкин сөйләгән.

Кичә Хөкүмәт 2025 елга эш һәм бәйрәм көннәре календарен раслады. Аның нигезендә 2024-2025 елда Яңа ел каникуллары 11 көн дәвам итәчәк - 29 декабрьдән 8 гыйнварга кадәр. Февраль һәм мартта традицион озын яллар булмаячак, аның каравы 2025 елның май бәйрәмнәрендә россиялеләр 4 көн ял итә - ай башында һәм Җиңү көне хөрмәтенә. Тагын 4 көн рәттән июньдә һәм өч көн рәттән ноябрьдә ял булачак.

«2025 елда ял өчен иң отышлы айлар - июль һәм октябрь айлары. Аларда 23 эш көне булачак. Икенче урында апрель, сентябрь, декабрь тора - аларда 22 эш көне. Иң азы - 17 эш көне 2025 елның гыйнварында була. Әмма Яңа ел каникуллары һәм якындагы ял көннәре арасында пәнҗешәмбе һәм җомга гына тора. Шул рәвешле, үз ялын озайтырга теләүчеләргә күп кенә «кыйммәтле» эш көннәре өчен түләүне «югалтырга» туры килмәячәк», - диде Становкин.

«Хезмәткәрнең отпуск түләүләреннән һәм хезмәт хакыннан суммар кереме ул ял итү өчен сайлаган айга карап аерылырга мөмкин. Чөнки ялда бер эш көне бәясе уртача коэффициент буенча исәпләнә. Хезмәт хакы айдагы эш көннәре саны арасында тигез бүленә, ә эш көннәре никадәр азрак булса, һәркайсы шулкадәр кыйммәтрәк була. Шулай итеп, бәйрәмнәр дәвамында ял алу уңайлы, әмма акча буенча һәрвакытта да отышлы түгел», - дип белдерде Становкин.

Эксперт билгеләп үткәнчә, отышлы ял итү өчен ял итүне алдан планлаштырырга кирәк. «МТС Travel» бәяләве буенча, иртә броньлау тарифларына ташламалар 40 процентка кадәр җитәргә мөмкин. Дисконтның булуы һәм күләме урнаштыру объектының тибына, аның номер фонды күләменә, локациягә, сату стратегиясенә һәм башка бик күп факторларга бәйле.

Сәхифәләр

Белгеч 2025 елда ял өчен иң отышлы айларны атады