Базарлы Матак командасы бадминтон буенча республика бәйгесендә беренче урын яулады
Алар Саратовта узачак Бөтенроссия ярышларында республика данын яклап чыгыш ясаячак.
(Әлки, 11 март, "Татар-информ", "Әлки хәбәрләре"). Әлки районы Базарлы Матак урта мәктәбе командасы бадминтон буенча республика бәйгесендә беренче урын яулады. Бу турыда җирле басма хәбәр итә.
“Проба пера” дигән исем астындагы әлеге бәйге Кама Тамагы районында узды. Республика күләмендә җиңүгә ирешкән бадминтон осталары – 7 сыйныф укучылары Булат Вәлиев, Дарья Борисова, Самат Фәхретдинов (5 сыйныф), Эльвина Хәйруллина (6 сыйныф) һәм Юлия Сивенкова (8 сыйныф).
Тренер Максим Муштаков кул астында шөгыльләнүче бу укучыларның беренче генә җиңүгә ирешүләре түгел инде.
Алар озакламый Саратовта узачак Бөтенроссия ярышларында республика данын яклап чыгыш ясаячак.