Авыл 17 сентябрь 2017 05:00

Баулы районында урак алдынгысы бүләкләнде

Бу юлы алдынгылар рәтендә барган Илназ Гыйльманов бүләкләнде.

Скопировать ссылку

(Баулы, 17 сентябрь, "Татар-информ", "Хезмәткә дан", Айгөл Хөсәенова). Басуларда комбайннар гөрли. Районда бөртекле культураларны урып-җыю ахырына якынлаша. Традиция буенча һәр атнада алдынгы комбайнчыларны бүләкләү дәвам итә. Бу атнада исә Баулы муниципаль районы башлыгы Рамил Гатиятуллин һәм авыл хуҗалыгы һәм азык-төлек идарәсе начальнигы Фәрит Кыямов “Бәкер” хуҗалыгы комбайнчылары белән очрашты. Бу юлы алдынгылар рәтендә барган Илназ Гыйльманов бүләкләнде, дип яза район газетасы.

– Һәр атна комбайнчыларның суктыру нәтиҗәләренә карап бүләклибез. Илназ башта УТТда эшләгән иде, хәзер ике ел комбайнны йөгәнли, - ди Рамил Гатиятуллин. - Мин аның өчен бик шат. Җирдә эшләгән һәр кешегә зур рәхмәтлебез. Уныш җыюны исән-сау гына тәмамларга булсын.

23 яшьлек Илназ Гыйльманов икенче генә ел эшләвенә карамастан, югары нәтиҗәләргә ирешкән. Ул урак башыннан 1571 тонна икмәк суктырган.

– Уңышлар әйбәт, яңгырлар яуды, башаклар эре, әкрен генә эшлибез, - ди Илназ. - Узган ел белән чагыштырганда уңыш бик яхшы. Күнелләребезне күтәреп, бүләкләп йөрүләре өчен рәхмәт. Эшләргә теләк тагын да артып китә.

Бүгенге көнгә район игенчеләре бөртекле культураларны чәчү мәйданының 85 процентыннан җыеп алганнар. “Бәкер” хуҗалыгында исә 87 процент мәйданнан җыеп алынган. Уңыш гектарыннан 31, 2 центнер тәшкил итә.

– Көннәр яхшы гына, яңгырсыз торса, ике көннән урып-җыюны тәмамлыйбыз. Хәзер инде көнбагыш кына суктырасы кала, - ди “Бәкер” крестьян - фермерлык хуҗалыгы җитәкчесе Марат Бакиров.

#Баулы #Хезмәткә дан

Сәхифәләр

Баулы районында урак алдынгысы бүләкләнде