Баулы китапханәчеләре махсус хәрби операциядә катнашучыларга окоп шәмнәре ясап җибәргән
Баулыда яшәүчеләр махсус хәрби операция зонасындагы якташларына булышуларын дәвам итә. Бу игелекле эшкә Баулы үзәк һәм балалар китапханәләре хезмәткәрләре дә кушылган. «Баулы-информ» шул хакта хәбәр итә.
2023 ел ахырында Баулыдагы үзәк һәм балалар китапханәләре хезмәткәрләре дә сугышчыларга җылы киемнәр, одеяллар һәм башка кирәк-яраклар җыйган.
«Махсус хәрби операциядәге якташларыбызга җыйган әйберләрне тапшырганда, эшмәкәр райондашыбыз Ринат Нуриев окоп шәмнәрен тутырырга ярдәм итүебезне үтенде. Шул ук көнне китапханә кызлары белән 90 окоп шәме ясадык. Ринат Нуриев аларга үзе балавыз агызды», – дип сөйләде Баулы үзәкләштерелгән китапханәләр системасы директоры урынбасары Фәридә Зыярова.
«Парафин белән балавыз таптык диярлек. Берәр көнне җыелышып, окоп шәмнәре ясарга кирәк», – ди Фәридә Зыярова.
Китапханә хезмәткәрләре кешеләрнең консерв банкалары алып килүләрен үтенә. Мондый буш савытларны җыйган баулылар, аларны үзәк китапханәгә китереп, хәзерге вакытта алгы сызыктагы якташларына ярдәм итүгә өлеш кертә ала.
Хәрбиләр мондый шәмнәр ярдәмендә ашарга әзерли, аның янында җылына, вак-төяк әйберләрне киптерә, землянка һәм окопларны яктырта. Алар күп урынны да алмый. Шәмне окопта кечкенә чокырга куйсаң, ут тышкы якка күренми.