Башкортстанда Ык елгасы аша күперне төзекләндерү вакытыннан алда төгәлләнә
Башкортстан Хөкүмәте матбугат хезмәте мәгълүматлары буенча, Татарстан белән чиктәге Ык елгасы аша күпернең әзерлеге 65 проценты тәшкил итә. Күпернең озынлыгы – 238,5 погонлы метр. Бу хакта «Башинформ» мәгълүмат агентлыгы яза.
Бүгенгә подрядчы оешма терәкләр урнаштырган, пролет төзелеше балкаларын монтажлау һәм монолитлау эшләре башкарылган, тигезләү катламы җәелгән. Шулай ук тимер киртәләр урнаштырылган, Октябрьск ягыннан күпергә керү урынында туфрак җәйгәннәр.
Ясалма корылмада гидроизоляция урнаштыру төгәлләнеп килә, агымны юнәлдерүче дамба авышлыгын монолит белән каплыйлар, Октябрьский ягыннан күпергә килү юлында нигезнең аскы катламына вак таш-ком катнашмасы сибәләр, Урыссу бистәсе ягыннан килү юлында Җир өслеген төзекләндерүне тәмамлыйлар.
Август башында юл эшчеләре күпергә һәм аңа керү юлларына асфальт-бетонның аскы катламнарын салырга планлаштыра. Реконструкция графиктагы вакыттан алда бара.
Ык елгасы аша салынган күпер авария хәлендә һәм аның аша йөрү куркыныч тудыра иде. Шуңа күрә 2024 елда корылманы реконструкцияли башладылар. Күперне яңарту юл йөрүне имин һәм уңайлы итә. Җәяүлеләр Ык елгасы аша күпердә ике яклап салынган махсус тротуарлардан йөри алачак, диелә хәбәрдә.