Башкортстанда Салават Юлаев истәлегенә флешмоб башладылар
Флешмоб 2020 елның 12-16 июнь көннәрендә узачак.
(Казан, 8 июнь, «Татар-информ»). 16 июньдә Башкорстанның милли каһарманы, шагыйрь һәм гаскәр башлыгы Салават Юлаевның тууына 266 ел тула. Быел Салават Юлаев көннәре беренче тапкыр онлайн-форматта узачак. Бу хакта «Башинформ» агентлыгы яза.
Башкортстан Республикасы Мәдәният министрлыгы, Республиканың халык иҗаты үзәге һәм фольклорны үстерү буенча «Башкортстан Республикасы чәчәннәре үзәге» милли каһарманның туган көненә багышланган флешмоб башлый.
Флешмобта халык авыз иҗатын сөйләүчеләр, яратучылар катнаша ала. Алар Салават Юлаевка багышланган җырлар башкарырга, хәрби шагыйрьнең шигырьләрен сөйләргә тиеш. Әлеге кадрлар булган видеороликлар социаль челтәрләрдә #БашҡортСәсәндәре #СалауатМенән #СалауатЮлаев #РЦНТРБ #МКРБ #ЦентрСэсэновРБ хештеглары буенча урнаштырыла.
Флешмоб 2020 елның 12-16 июнь көннәрендә узачак.