Башкортстанда башкорт теленә багышланган флешмоб булды
Интернет-марафонга «Башкортостан» дәүләт концерт залы коллективы да кушылды.
(Казан, 16 декабрь, «Татар-информ»). Башкортстанда декабрь башында социаль челтәрләрдә «Аҫылташ» интернет-марафоны старт алды. Анда яшь авторлар, танылган артистлар һәм җәмәгать эшлеклеләре башкорт телендә шигырьләр укый. Бу хакта «Башинформ» агентлыгы хәбәр итә.
Интернет-марафонга «Башкортостан» дәүләт концерт залы коллективы да кушылды. Концерт залы директоры, Башкортстанның халык артисты Вильдан Яруллин Мостай Кәримнең «Йәшәйһе бар, һаҡла үҙеңде, тиһең…» дигән шигырен укыды.
Концерт залы белән бергә акциядә Вильдан Яруллинның күптәнге дусты һәм хезмәттәше – Башкортстанның халык артисты Рәсүл Карабулатов та катнашты. Концерт залының сәнгать бүлеге мөдире Владимир Стаханов һәм «Шаян» халык бию ансамбле җитәкчесе Илшат Фәсхетдинов шигырь һәм бию элементларын үз эченә алган номер башкарды.
Башкортстан Республикасы Башлыгы Радий Хәбировның указы нигезендә 14 декабрьдә Башкортстанда Башкорт теле көне узды.