news_header_top_970_100
news_header_bot_970_100

Башкортстан Рәссамнар берлеге юбилеен билгели

Башкортстан Рәссамнар берлегенең оештырылуына 75 ел тулды. Шушы уңайдан республикада байтак чаралар каралган

(Уфа, 7 декабрь, “Татар-информ”, Фәнис Фәтхуллин). Башкортстан Рәссамнар берлегенең оештырылуына 75 ел тулды. Шушы уңайдан республикада байтак чаралар каралган.
Төп тантаналы чара Уфаның мәһабәт Конгресс-холл бинасында үтте. Бәйрәм кичәсенә Мәскәүдән Россия Рәссамнар берлеге идарәсе рәисе Андрей Ковальчук һәм башка төбәкләрнең Рәссамнар берлекләре җитәкчеләре дә килгән иде.
Тантаналы кичә барышында кайбер рәссамнарга медальләр һәм дипломнар, мактау кәгазьләре, истәлекле бүләкләр тапшырылды. Бәйрәм бик матур мәдәни чара белән үрелеп барды.
БР Рәссамнар берлеге юбилее уңаеннан Уфа Сәнгать галереясендә республиканың барлык билгеле рәссамнарының эшләреннән зур күргәзмә оештырылды. Бу күргәзмә бер ай дәвамында эшләячәк.
Башкортстан рәссамнары үзләренең талантлы эшләре белән Россиядә генә түгел, ә күп кенә чит илләрдә дә танылу алды һәм абруй яулады.
Татар рәссамнары иҗаты да аерым мактауга лаек. Күренекле рәссамнар Әдия Ситдыйкова, бертуган Вәкил һәм Вәгыйзь Шәйхетдиновлар, Рафаэль Кадыйров, Расих Әхмәтвәлиев, Вәсил Ханнанов, Ринат Харисов, Ринат Миңнебаев, Тәлгать Мәсәлимов һәм башка дистләгән талантлы татар иҗатчылары үз эшләре белән Башкортстан рәсем сәнгатен югары дәрәҗәгә күтәрде.

news_right_column_1_240_400
news_right_column_2_240_400
news_bot_970_100