Башкортстан прокуратурасы суда куркынычсызлык кагыйдәләрен үтәүне катгый тикшерә
Бу көннәрдә Башкортстанда туристлар елга агымы буйлап көймәдә йөзгәндә, ике бәхетсезлек очрагы килеп чыккан.
(Казан, 30 апрель, “Татар-информ”). Бу көннәрдә Башкортстанда туристлар елга агымы буйлап көймәдә йөзгәндә, ике бәхетсезлек очрагы килеп чыккан. Бер турист һәлак булу, икенчесе хәбәрсез югалу очрагыннан соң, Башкортстан прокуратурасы суда куркынычсызлык кагыйдәләрен үтәүне катгый тикшерә. Россия Тикшерү комитетының төбәкара идарәсендә башланган тикшерүне Башкортстан республикасы прокуратурасы контрольдә тота. Бу хакта "Башинформ" агентлыгы хәбәр итә.
Искәртеп үтик, 29 апрельдә Кече Инзер елгасында Айгир бусагасы тирәсендә барлыгы тугыз кеше утырган ике катамаран бәрелешә. Төркемдәге Санкт-Петербургтан килгән 33 яшьлек хатын-кыз турист һәлак була.
Тагын бер фаҗига Ләмәзе елгасында килеп чыга. Суга капланган катамаранда өч кеше була. Ике кеше исән кала, ә өченче туристны эзләү эшләре әле дә дәвам итә.
"Республика прокуратурасы катамаранда йөзүчеләрнең куркынычсызлык кагыйдәләрен ничек үтәвен тикшерә”, - дип хәбәр иткән күзәтчелек оешмасының матбугат-хезмәте.