Башкортстан Башлыгының хатыны коронавирус буенча кайнар элемтә волонтеры булган
Каринэ Хәбирова студентлар белән бергә шалтыратулар кабул иткән, республика халкы белән аралашкан, азык-төлек сатып алу өчен гаризалар формалаштырган.
(Казан, 7 апрель, «Татар-информ»). Башкортстан Башлыгының хатыны Каринэ Хәбирова 6 апрель көнне коронавирус инфекциясен кисәтү буенча волонтер-табиблар штабына волонтер булып эшләргә килгән. Бу хакта «Башинформ» агентлыгы хәбәр итә.
Ул студентлар белән бергә шалтыратулар кабул иткән, республика халкы белән аралашкан, азык-төлек сатып алу өчен гаризалар формалаштырган.
Барлык волонтерлар да шәхси саклану чаралары: медицина битлекләре, перчаткалар һәм антисептиклар белән тәэмин ителгән.
Кайнар элемтә карантин һәм изоляциядә булган кешеләр, шулай ук өлкән яшьтәге һәм физик мөмкинлекләре чикле гражданнарга ярдәм күрсәтү өчен #МыВместе акциясе кысаларында эшли. Кайнар элемтәгә көн саен йөзгә якын шалтырату килә, һәр көнне гаризалар буенча иллегә якын заказ әзерләп илтәләр, диелә хәбәрдә.
Кайнар элемтә телефоннары: 8-800-200-34-11 (Россия); 8 (347) 273-55-44 (Башкортстан).