Җәмгыять 11 июнь 2009 11:27

Башкортстан бәйрәмнәр дәрьясына күмелде

Башкортстан халкы алдагы өч көндә берьюлы өч бәйрәмдә күңел ачачак

Скопировать ссылку

(Уфа, 11 июнь, “Татар-информ”, Фәнис Фәтхуллин). Башкортстан халкы алдагы өч көндә берьюлы өч бәйрәмдә күңел ачачак.
Иртәгә, һәр җирдәгечә, Башкортстанда да Россия көне билгеләнә. Шулай ук һәр елны 12 июньдә Уфа көне дә бәйрәм ителә. Өстәвенә, бу көнгә соңгы елларда башкортның милли батыры саналган Салават Юлаев туган көн дә килеп кушылды. Иртәгә Уфада, Салават Юлаев исемендәге мәйданда башлана Пугачев яудашының туган көнен билгеләү. Ә кичке якта бәйрәм чаралары башкаланың Ленин исемендәге мәйданына күчә. Анда яшьләр Россия көнен бәйрәм итәчәк. Тантаналар кичке унбердә фейерверк белән тәмамлана.
Бәйрәм чараларында Уфада үтүче Башкортстан халыклары ассамблеясенең 2 нче корылтае делегатлары да катнаша. Бәйрәмнәр уңаеннан Башкортстан халкы өч көн ял итә.
Алдагы өч көндә Башкортстан районнарында сабантуйлар да оештырыла. Милли бәйрәмебез шушы атна азагында барлык төбәкләрдә дә үтеп бетәчәк. Моңа кадәр утызга якын районда оештырылган иде инде ул.

Сәхифәләр

Башкортстан бәйрәмнәр дәрьясына күмелде