Мәдәният 29 июнь 2010 16:33

Башкорт академтеатры иҗат мизгелен премьера белән яба

Алар яшь шагыйрь һәм драматург Салават Әбүзәрнең “Хыялый” исемле пьесасын сәхнәләштерде

Скопировать ссылку

(Уфа, 29 июнь, “Татар-информ”, Фәнис Фәтхуллин). Мәҗит Гафури исемендәге Башкорт дәүләт академия драма театры бүген үзенең чираттагы иҗат мизгелен яба. Быелгы сезон данлыклы театр өчен аеруча истәлекле – 90нчы иҗат мизгеле булды бу.
Гафурилылар бүген быелгы иҗат елын яңа премьера белән яба. Алар яшь шагыйрь һәм драматург Салават Әбүзәрнең “Хыялый” исемле пьесасын сәхнәләштерде. Әлеге тамашаны быел Борис Щукин исемендәге театр институтын тәмамлаучы яшь белгеч Арслан Янбәков сәхнәгә куйган. Бу аның диплом эше буларак кабул ителгән.
М. Гафури академтеатрының яңа эше бик кызыклы. Җиңел юмор, романтик рух белән сугарылган ул. Бүгенге авыл тормышы, андагы ярымхыялый хәлләр сурәтләнә бу әсәрдә.
Спектакль премьерасы башланыр алдыннан, М. Гафури театры артистлары, һәр елдагыча, урамда, ачык һавада матур концерт-театрлаштырылган тамаша да күрсәтәчәк. Бераз ял итеп алгач, сәнгать осталары кайбер төбәкләргә җәйге гастрольләргә барырга да җыена.

Сәхифәләр

Башкорт академтеатры иҗат мизгелен премьера белән яба