Җәмгыять 17 июль 2018 16:34

Башкаланың төп Яңа ел чыршысы “Казан” гаилә үзәге янына күчә

2019 елда төзекләндерелеп бетәчәк фан-зона даими чаралар уздыру урыны булачак.

Скопировать ссылку

(Казан, 17 июль, “Татар-информ”). Татарстан башкаласының төп Яңа ел чыршысын “Казан” гаилә үзәге каршына күчәчәк. Ул футбол буенча Дөнья чемпионаты вакытында җанатарлар фан-зонасы булган мәйданда урнаштырылачак. Әлеге карар турында бүген Татарстан Хөкүмәте Йортында узган брифингта Казан шәһәре башкарма комитеты җитәкчесе урынбасары – Шәһәрне тышкы төзекләндерү комитеты рәисе Игорь Куляжев сөйләде.

2018 елгы футбол буенча Дөнья чемпионаты вакытында җанатарлар фан-зонасы 800 меңнән артык кешене кабул итте. Зона берьюлы 25 мең кешене сыйдыра ала.

Куляжев әйткәнчә, бирегә алдан ук су белән тәэмин итү торбалары, электр челтәре һәм канализация сузылган.

Моннан тыш, алга таба биредә фонарьлар куелачак. Шәһәрне тышкы төзекләндерү комитеты рәисе сүзләренчә, аларны футбол фанатларына комаучаулык тудырмасын өчен куймый торганнар.

Соңгы елларда Казанның төп чыршысы Үзәк стадион янында куела иде. Аннан алдарак ул Казанның Меңъеллык паркында да урнаштырылды.

#яңа ел чыршысы #җанатарлар зонасы #"казан" гаилә үзәге

Сәхифәләр

Башкаланың төп Яңа ел чыршысы “Казан” гаилә үзәге янына күчә