Баш консул Төркиянең татарлар белән бәйле урыннарына турлар булдыру тәкъдимен хуплады
Туристик ширкәтләргә бу тәкъдимне җиткерәчәкмен, диде ул.
(Казан, 26 декабрь, «Татар-информ», Алсу Исмәгыйлева). Төркиянең Казандагы баш консулы Исмәт Эрикан туристик ширкәтләргә Төркиягә татарлар өчен махсус турлар булдыруны тәкъдим итәчәген әйтте. Бу хакта ул «Татар-информ» хәбәрчесенә белдерде.
«Россиядән Төркиягә килгән туристларга төрле турлар тәкъдим ителә, ләкин алар, гадәттә, төрле милләт һәм дин вәкилләре өчен уртак. Ә татар кешесе өчен кызыклы турлар тәкъдим итү мөмкинлеге булмасмы? Мәсәлән, Төркия тарихына кереп калган татар шәхесләре — Садри Максуди, Гаяз Исхакый белән бәйле урыннарны күрү файдалы булыр иде», — дип тәкъдим итте «Татар-информ» журналисты.
Бу тәкъдимне Исмәт Эрикан файдалы дип тапты. «Ел саен Татарстаннан 400-450 мең турист Төркиягә килә. Төркиядә Тукай һәйкәлләре, парклары бар. Татарлар яшәгән төбәкләрне, татар мәчетләрен барып күрү дә кызыклы булыр иде. Туристик ширкәтләргә бу тәкъдимне җиткерәчәкмен», — диде ул.
Баш консул мондый турларның популяр булу-булмавы ихтыяҗга бәйле дип искәртте.