news_header_top_970_100
news_header_bot_970_100

Балтачта күп балалы әниләр арасында бәйге үтте

Анда районның төрле авылларыннан 15 күп балалы әни өч командага бүленеп көч сынашты.

(Балтач, 25 ноябрь, “Татар-информ”, “Хезмәт”, Ясминә Шәмсетдинова).  Балтач районы мәдәният йортында Әниләр көненә багышланган “Газиз әниләр” дип исемләнгән бәйге үтте. Анда күп балалы унбиш әни, өч командага бүленеп, көч сынашты, дип яза җирле басма.

18 яшькә кадәрге өч һәм аннан күбрәк бала үстерүчеләр бер командага тупланса, 18 яшьтән өлкән күп балалы әниләр икенче команданы тәшкил итте. Ә өченче командада инде балалары гаилә корган, күп бала үстергән әбиләр иде.

Командалар өй эше итеп бирелгән визит карточкасы күрсәттеләр, зирәклектә һәм тапкырлыкта көч сынаштылар, “Көйне таны”дылар, иҗади һәм уңганлык бәйгеләрендә, кыскасы, үзләренең бар яктан нәрсәгә сәләтле булуларын күрсәттеләр.

Бәйге матур җырлар, котлаулар белән үрелеп барды. Җиңүчеләрне һәм залдагы барлык әниләрне район башлыгы Рамил Нотфуллин тәбрикләде. Бәйге катнашучы ханымнарга оештыручылар дипломнар, истәлек бүләкләре бирсә, хәләл җефетләре, балалары, оныклары чәчәк бәйләмнәре белән сөендерде.

news_right_column_1_240_400
news_right_column_2_240_400
news_bot_970_100