«Бәллүр каләм – 2026»: конкурс лауреатлары һәм төп приз – автомобиль иясе

Казанда журналистика һәм массмедиа өлкәсендәге «Бәллүр каләм» республика конкурсы җиңүчеләрен тантаналы рәвештә бүләкләделәр. Быел бәйге өстәмә номинацияләр һәм яңартылган кагыйдәләр буенча узды.

«Бәллүр каләм» бәйгесенең яңалыклары

Журналистика һәм массмедиа өлкәсендәге «Бәллүр каләм» республика конкурсы быел Татарстанда 29 нчы тапкыр оештырылды. Җиңүчеләрне бүләкләү тантанасы Казанның «Пирамида» мәдәни-күңел ачу комплексында үтте.

2025 ел белән чагыштырганда, 2026 елда конкурс шактый үзгәрде. Быел бәйгегә конкурс эшләрен редакцияләр генә түгел, ә дәүләт органнары, муниципалитетлар һәм юридик затлар да тәкъдим итә алды. Моннан тыш, премияләрнең суммасы арттырылды.

Номинацияләр структурасы да үзгәрде. Оештыручылар традицион редакцияләргә генә түгел, заманча медиаформатларга – блогерларга, авторлык медиапроектларына һәм журналистларның шәхси брендларына да игътибар юнәлтте. Элеккеге «Үз һөнәрендә иң яхшысы» һәм «Популяр блогер» номинацияләре урынына «Ел журналисты», «Иң яхшы блогер», «Иң яхшы медиаблог» һәм «Ел медиапроекты» номинацияләре кертелде.

Быел конкурска барлыгы 202 гариза кабул ителгән. Узган елда 144 гариза булган.

«Профессионалның иң төп билгесе – ул үткен акыл»

Татарстан Журналистлар берлеге рәисе, «Яңа Гасыр» (ТНВ) телерадиокомпаниясе генераль директоры Илшат Әминов тантанада сәламләү сүзе белән чыгыш ясады.

«Биредә уникаль кешеләр утыра. Сез бөек сәләткә һәм зур кодрәткә – дөньяны үзгәртү, кешеләргә булган вакыйгалар турында сөйләү көченә ия», - диде ул.

«Татмедиа» республика матбугат һәм массакүләм коммуникацияләр агентлыгы җитәкчесе Айдар Сәлимгәрәев җыелган барлык кунакларны Татарстан Республикасы Матбугат көне белән котлады.

«Иң мөһиме – каләмегез һәм акылыгыз һәрвакыт үткен булсын. Профессионалның иң төп билгесе – ул үткен акыл», – дип билгеләде ул.

Җиңүгә кемнәр иреште?

Аннары Татарстан Республикасы журналистика һәм массмедиа өлкәсендәге XXIX «Бәллүр каләм – 2026» конкурсы җиңүчеләрен бүләкләү тантанасы башланды.

Быел түбәндәге номинацияләрдә җиңүчеләр билгеләнде:

• «Журналистикада исем»: Лилия Нургалиева («Хезмәт даны» газетасы), Рамил Гарипов («Яңа Гасыр» ТРК);
• «Иң яхшы район редакциясе»: «Лениногорск-информ», «Питрәч-информ»;
• «Иң яхшы республика, шәһәр редакциясе»: Татмедиа NEO контент-үзәге, «Интертат» электрон газетасы;
• «Ел журналисты»: Елизавета Черкина («Казанские ведомости» газетасы), Алия Хәйретдинова («Яңа Гасыр» ТРК);
• «Объектив аша караш»: Фирүзә Вәлиева («Идель-Идел» журналы), Ленар Хәбибуллин («Татарстан» ДТРК);
• «Нәтиҗәле матбугат хезмәте»: Татарстан Республикасы Рәисе матбугат хезмәте;
• «Иң яхшы блогер»: Марат Әхмәтов;
• «Иң яхшы медиаблог»: Гөлгенә Гыйльманова («Ватаным Татарстан» газетасы);
• «Туган тел»: Аделия Төхбәтова («Яңа Гасыр» телерадиокомпаниясенең Казахстан Республикасындагы корреспондентлык пункты);
• «Ел медиапроекты»: «Зов разума» хәйрия фонды коллективы («Сила слова в реальной помощи» проекты);
• «Ел медиашәхесе»: Татарстан Республикасы хезмәт, мәшгульлек һәм социаль яклау министры Эльмира Зарипова.

Эльмира Зарипова, бүләкне алганда, 1990 еллар азагында Яшел Үзән матбугат хезмәтендә эшли башлаган вакытын искә алды.

«Мин белгечтән алып җәмәгатьчелек белән элемтәләр бүлеге җитәкчесенә кадәр юл үттем. Бу залда Яшел Үзәндә хезмәт иткән һәм мине массакүләм мәгълүмат чаралары белән эшләргә өйрәткән тармак ветераннары бар», – диде Зарипова һәм өлкән хезмәттәшләренә рәхмәт белдерде.

Махсус номинацияләр

Махсус номинацияләрдә дә бәллүр каләмнәр тапшырылды. Алар арасында «Иң яхшы график дизайн («Татарстан» ДТРК) номинациясе дә бар.

«Ватанны саклаучылар елын һәм Җиңүнең 80 еллыгын иң яхшы яктыртучы» махсус номинациясендә бүләкне Россия Герое Александр Лапин тапшырды.

«Бүген сез мәгълүмати сугышның алгы сызыгында. Яхшылык белән явызлык арасында хәлиткеч сугыш бара. Кешелек акылы өчен сугыш, безнең киләчәгебез өчен сугыш», – дип билгеләп үтте ул.

Бүләкләр Эльмира Гайнетдиновага («Чаллы-ТВ» ТРК) һәм «Болгар радиосы» коллективына тапшырылды.

«Хакимият һәм җәмгыять арасындагы диалогны ныгытуга керткән өлеше өчен» махсус дипломы белән Татарстан Дәүләт Советының матбугат хезмәте бүләкләнде.

Төп приз – автомобиль

Гран-прины Татарстан Премьер-министры урынбасары Ләйлә Фазлыева тапшырды. Аның фикеренчә, «Бәллүр каләм» – ул үзенчәлекле метафора.

«Бәллүр һәм каләм сызыгы. Бу, бер яктан, нәфислек, икенче яктан – үткенлек символы. Ләкин, иң элек, бу метафора матурлыкны аңлата», – диде Фазлыева.

Республика җитәкчелегеннән төп призга – Lada Vesta автомобиленә «Шәһри Чаллы» газетасының баш редакторы Резидә Йосыпова ия булды.

«Татар-информ» баш редакторына Татарстанның атказанган матбугат һәм массакүләм коммуникацияләр хезмәткәре исеме бирелде

«Татар-информ» мәгълүмат агентлыгының баш редакторы Ринат Билаловка Татарстан Рәисе указы белән «Татарстан Республикасының атказанган матбугат һәм массакүләм коммуникацияләр хезмәткәре» дигән мактаулы исем бирелде. Бүләкне Ләйлә Фазлыева тапшырды.

«Сезгә катлаулы хәлләр килеп чыкканда республика халкына мәгълүмат җиткерү процессында максималь дәрәҗәдә катнашканыгыз өчен рәхмәт белдерәм», – диде Фазлыева.

Моннан тыш, «Татмедиа» АҖ башкарма директоры Нияз Гәрәев «Фидакарь хезмәт өчен» медале белән бүләкләнде.