Бәләбәй татар гимназиясе укучылары төбәкара олимпиада призерлары булды
Башкортстанның Бәләбәй татар гимназиясе укучылары Татарстан Республикасы Мәгариф һәм фән министрлыгы уздырган татар теле һәм әдәбияты буенча төбәкара олимпиадада призерлары булды. Бу хакта «Бәләбәй хәбәрләре» сайтында Зәйфә Салихова яза.
Укытучы һәм остаз елы кысаларыңда Халыкара туган тел көне алдыннан узган зур чарада Башкортстаннан төбәк этапларында җиңү яулаган һәм призер булган 27 укучы катнашкан. Алар исәбендә Бәләбәй татар гимназиясенең IX сыйныф укучылары Самира Ширинова белән Гүзәл Билалова (укытучылары Резеда Гыйззәтуллина) олимпиаданың барлык теоретик һәм гамәли биремнәрен үтәп, туган татар телен яхшы белүләрен күрсәтеп, призер булуга ирештеләр, дип яза «Бәләбәй хәбәрләре».
Барлык җиңүчеләргә һәм призерларга ТР Мәгариф һәм фән министрлыгының дипломнары, ә укытучы-остазларга укучыларны олимпиадага әзерләгәннәре өчен министрлыкның мактау грамоталары тапшырылган.