Сәхифәләр
«Татар-информ» мәгълүмат агентлыгы баш редакторы
Ринат Билалов
420066, Татарстан Республикасы, Казан, Декабристлар ур., 2нче йорт.
«ТАТМЕДИА» акционерлык җәмгыяте
«Татар-информ» мәгълүмат агентлыгы татар редакциясе
Баш редактор
Рәмис Латыйпов
Баш редактор урынбасары
Ләйсән Хафизова
Бөтенроссия гүзәллек форумында «Яшьләр – киләчәккә караш» темасына фикер алышканнар
«Гүзәллек – уңышның формуласы» секциясендә бүгенге мөселман ханымнары өчен генә түгел, Россиядә барлык хатын-кызлар өчен актуаль темалар күтәрелгән.
(Казан, 18 декабрь, «Татар-информ»). Башкортстан Республикасы башкаласы Уфада VI Бөтенроссия гүзәллек форумында «Яшьләр – киләчәккә караш» темасына фикер алышканнар. Бу хакта Россия мөселманнары Үзәк Диния нәзарәте матбугат хезмәте хәбәр итә.
Форумда психологлар, социологлар, язучылар, педагоглар, табиблар, дин һәм җәмәгать эшлеклеләре, Мәскәү, Санкт-Петербург, Казан, Липецк, Төмән, Кырым һәм Дагыстаннан килгән делегатлар, шул исәптән Россия Мөселман хатын-кызлары берлеге рәисе Наилә Җиһаншина, Төмән өлкәсе имам-мөхтәсибе Илдар Җиһаншин, Кырым мөфтие урынбасары Әсәдуллах Баиров һ.б. катнашкан.
«Яшьләрне рухи-әхлакый тәрбияләү: киләчәккә юл» (модераторы - Башкортстан Республикасы Дәүләт Җыены – Корылтай каршындагы Яшьләр иҗтимагый палатасы рәисе Зәринә Газизова) секциясендә интернетның балаларга йогынтысы һәм яшүсмерләрне сәламәт яшәү рәвешенә җәлеп итү хакында сүз барган.
«Гүзәллек – уңышның формуласы» (модераторы - «Аиша» журналы баш мөхәррире Гөлбикә Хайрльварина) секциясендә исә бүгенге мөселман ханымнары өчен генә түгел, Россиядә яшәүче барлык хатын-кызлар өчен дә актуаль темалар күтәрелгән. Кайсын сайларга: бәхетнеме әллә уңышнымы? Башкаларны илһамландыру өчен нишләргә? Эчке гармониягә ни рәвешле ирешергә? Әлеге һәм башка сораулар тыңлаучыларда зур кызыксыну уяткан.
Чараны Башкортстан Республикасы Дәүләт Җыены – Корылтай каршындагы Яшьләр иҗтимагый палатасы, Россия мөселманнары Үзәк Диния нәзарәтенең «Гыйбадеррахман» иҗтимагый хәрәкәте һәм «Аиша» журналы белән берлектә Россия мөселманнары Үзәк Диния нәзарәте оештырган.
Форум тантаналы кичке аш белән тәмамланган. Анда чыгышлар, үзара фикер алышулар дәвам иткән, дини һәм иҗтимагый оешма активистлары бер-берсе белән танышкан, киләчәккә планнар билгеләгән.
Кызыклы яңалыкларны күзәтеп бару өчен Телеграм-каналга язылыгыз