Рәсми Татарстан 21 февраль 2017 21:08

Бәхрәйн короле: Без Татарстанны Россиянең иң уңышлы төбәкләренең берсе дип беләбез

Рөстәм Миңнеханов эш визиты белән Бәхрәйнда.

Скопировать ссылку

(Казан, 21 февраль, “Татар-информ”). Бүген Россия Федерациясе сәнәгать һәм сәүдә министры Денис Мантуров Бәхрәйн корольлегенең Манама шәһәрендә Бәхрәйн короле Хәмәд Әл Хәлифә белән очрашкан. Чарада шулай ук Татарстан Республикасы Президенты Рөстәм Миңнеханов та катнашкан. Бу хакта Татарстан Республикасы Президенты матбугат хезмәте хәбәр итә.

Очрашуда катнашучылар өметле юнәлешләр буенча үзара хезмәттәшлек мәсьәләләре турында сөйләшкән. Аерым алганда, әңгәмә вакытында сәүдәне диверсификацияләү һәм аның күләмнәрен арттыру өчен уңайлы шартлар тудыру мөмкинлекләре каралган.

Денис Мантуров Россиянең Бәхрәйн белән мөнәсәбәтләре үсешенә зур игътибар бирүен искәрткән. Ул Татарстан Республикасының Фарсы Култыгы дәүләте белән ике яклы хезмәттәшлекне киңәйтүдә аеруча кызыксынуын билгеләп узган.

Бәхрәйн короле үз чиратында Татарстанны Россиянең иң уңышлы һәм тиз үсеш кичергән төбәкләренең берсе дип белүен хәбәр иткән. “Без республика Президенты Рөстәм Миңнехановны да яхшы беләбез. Аны яратабыз һәм хөрмәт итәбез”, - дип өстәгән Хәмәд Әл Хәлифә.

#Рөстәм Миңнеханов #Денис Мантуров #Бәхрәйн

Сәхифәләр

Бәхрәйн короле: Без Татарстанны Россиянең иң уңышлы төбәкләренең берсе дип беләбез