Бүген Кариев театрының яңа бинасына "Г.Кариев театры" дигән язу беркетелде
Габдулла Кариев исемендәге Казан Татар яшь тамашачы театры яңа бинага гыйнвар аенда күченер дип көтелә.
(Казан, 11 декабрь, «Татар-информ», Рузилә Мөхәммәтова). Бүген Кариев театрының яңа бинасына “Г.Кариев театры” дигән язу беркетелде.
“Габдулла Кариев: “Без шундый театр төзербез, аның исеме алтын хәрефләр белән язылыр”, – дип әйтеп калдырган. Бүген беренче татар профессиональ театр труппасына нигез салучыларның берсе булган Кариевның үз исеме дә театр бинасына алтын хәрефләр белән уелды”, – ди театр директоры Мансур Ярмиев.
Габдулла Кариев исемендәге Казан Татар яшь тамашачы театры яңа бинага гыйнвар аенда күченер дип көтелә.
Билгеле булганча, Петербург урамы 55 б адресы буенча урнашкан бинада элек “Победа” кинотеатры, аннары Офицерлар йорты иде.
