Бүген Азнакай районы Актүбә бистәсендә өй туе

(Азнакай, 25 май, "Татар-информ", "Маяк", Резедә Шәрипова). Бүген Актүбә бистәсендә 18әр фатирлы ике торак йорт файдалануга тапшырылды. Аларга аварияле торакта яшәүче 29 гаилә һәм 5 ятим бала күчә, дип яза район газетасы.

Әлеге чарада Азнакай муниципаль районы башлыгы Марсель Шәйдуллин, бистә башлыгы Роза Галиева, Татарстан Республикасы Президенты каршындагы Дәүләт торак фонды вәкиле Ильяс Яхудин, җирле депутатлар катнашты.

– Актүбәлеләр өчен бу көтеп алган шатлыклы вакыйга. Матур, якты, барлык уңайлыклары булган фатирларда һәркемгә исән-сау, имин, куанып яшәргә язсын, – диде Марсель Шәйдуллин үзенең куанычлы вакыйга белән тәбрикләү чыгышында.

Аварияле торактан гражданнарны күчерү программасы буенча төзелгән әлеге өчәр катлы йортлар Ленин урамында урнашкан. Йортларны төзетүче-инвесторы – Татарстан Республикасы Президенты каршындагы Дәүләт торак фонды.

5 нче санлы йортны Марсель Сәмигуллин җитәкчелегендәге «Азнакай ПМК», ә 11 нче санлысын Марат Әмирханов җитәкчелегендәге «Альмастрой» җәмгыятьләре күтәргән.
Фатирларга пластик тәрәзәләр, заманча ишекләр куелган, стеналарга обойлар ябыштырылган, сантехник җиһазлар урнаштырылган. Ә иң мөһиме – ике контурлы котеллар белән җылытылуы. Бу коммуналь хезмәтләргә түләүдә зур экономия бирәчәк. Шулай ук йорт яны территориясе дә төзекләндерелгән: яңа асфальт юллар түшәлгән, түтәлләргә кара туфрак кайтартылган, инде агач-куаклар белән яшелләндерәсе генә калган.

Актүбә бистәсе башлыгы Роза Галиева халыкның тормыш шартларын яхшыртуны кайгыртулары өчен республика һәм район җитәкчелегенә, сыйфатлы эшләре өчен төзүчеләргә рәхмәтен белдерде.

– Яшь бала белән кеше фатирында акча түләп тора идек. Үзебезнең ике бүлмәле кушыбыз булды хәзер. Социаль ипотеканың проценты да югары түгел, – ди Айгөл Едутова.
Җиде яшьләреннән тәрбиягә алган кызлары өчен Фина Гәрәева да чиксез шат. Бертуган Раушания, Лиана һәм Диана Фәттаховалар бу көнне һәрберсе фатирлы булды.

– Өйле булдым, өйләнәсе генә калды, – диде Рафаэль Галиев тә. Язмыш аның да башыннан сыйпап үстермәгән. Хөкүмәтебез ятимнәрне әнә шулай кайгырта.

Актүбә аварияле торактан гражданнарны күчерү программасында 2013 елдан бирле катнаша. Шул чор эчендә бистәдә 4 торак йорт файдалануга тапшырылып, 100 гаилә яңа фатирларга күченгән. Бүген менә тагын 34 гаиләгә бәхет елмайды. Быел 33 фатирлы йортка нигез салына башлаган, диелгән район хәбәрендә.