Азнакайдан Шакировлар иң иҗади гаилә исеменә лаек булды
Алар "Иҗади гаилә" номинациясендә беренче дәрәҗә лауреат булды.
(Азнакай, 23 май, "Татар-информ", "Маяк" , Резеда Шәрипова). Азнакайдан Шакировлар гаиләсе “Без бергә” республика конкурсының зона турында “Иҗади гаилә” номинациясендә – беренче дәрәҗә, республика турында икенче дәрәҗә лауреат булдылар. Бу турыда җирле басма хәбәр итә.
Бу гаиләдә, халкыбызның милли традицияләрен саклап, сәнгатькә гашыйк кешеләр яши. Илһам һәм Илнар Шакировлар – танылган баянчылар, халыкара конкурслар лауреатлары. Гаилә башлыгы Бакир Шакиров һөнәре буенча сәнгатьтән ерак торса да, оста гармунчы. Ә тормыш иптәше Сәрия Шакирова – Азнакай халык театрының данлыклы артисткасы.
Киленнәре дә, оныклары да шәһәрнең мәдәни тормышында актив катнаша.