Авыл 19 август 2017 00:00

Азнакайда урак алдынгыларына сертификатлар тапшырдылар

КамАЗ машинасында ашлык ташучы Рамил Җәлилов та премиягә лаек булды.

Скопировать ссылку

(Азнакай, 19 август, "Татар-информ”, "Маяк", Энҗе Галәветдинова). Азнакайда урып-җыюда яхшы күрсәткечләргә ирешкән комбайнчыларга, аларның ярдәмчеләренә, ашлык ташучы машина йөртүчеләргә – гомумән, урак чорында тырыш хезмәт куйганнарга акчалата сертификатлар тапшыру дәвам итә, дип яза район газетасы.

Кәкре Елга авылының “Марс” хуҗалыгы басуында да шундый алдынгылар гына эшли. Аяз көннең игенчеләргә рәхәтләнеп эшләргә мөмкинлек бирүе күренә: йөзләрендә елмаю, канәгатьләнү хисе чагыла. Тимер атларын туктатып, төшке ашка җыелганнар. Хезмәтчәннәрнең ял вакытын җыр-моң белән бизәргә “Азнакай гүзәлләре” триосы һәм җирле мәдәният үзешчәннәре килгән. Авыл хуҗалыгы идарәсе җитәкчесе Миргасим Усманов комбайнчылар Азат Галәветдинов, Илдар Хәйруллинга, аларның ярдәмчеләре, ышанычлы дәвамчылары – уллары Айрат Галәветдинов һәм Илнар Хәйруллинга тантаналы төстә сертификатлар тапшырды, игенчеләрнең тырышлыкларын югары бәяләп, аларга тирән рәхмәт сүзләрен җиткерде. КамАЗ машинасында ашлык ташучы Рамил Җәлилов та премиягә лаек булды.

Сүз дә юк, мондый кызыксындыру чаралары икмәк фронтында хезмәт куючыларга тагын да тырышыбрак эшләргә этәргеч бирә.

Аш-су осталары пешергән тәмле ризыктан соң тагын да көч-куәт кереп киткәч, игенчеләр, җиң сызганып, комбайннарына атладылар. Иркенләп утырыр вакыт түгел: уракның кызган чоры.

#Азнакай #Маяк

Сәхифәләр

Азнакайда урак алдынгыларына сертификатлар тапшырдылар