Авыл 14 октябрь 2017 06:00

Азнакайда шәһәр егетләре көнбагыш суктыра

Суктырып алынган бөртекләр май ясар алдыннан эшкәртелү өчен Зәй элеваторына озатыла.

Скопировать ссылку

(Азнакай, 14 октябрь, "Татар-информ", “Маяк”, Энҗе Галәветдинова). Азнакай районы басуларында хезмәтнең әле дә тынып торганы юк. Хәзер көнбагыш та өлгерде. Быел 7 меңгә якын гектарда чәчелгән мәйданның күпчелеге “Азнакай” агрофирмасы биләмәләрнә туры килә. Район буенча уңыш һәр гектардан 22 центнер тәшкил итә, дип яза җирле басма.

Әлеге югары табышлы культура районда моннан 6-7 ел элек игелә башлады. Суктырып алынган бөртекләр май ясар алдыннан эшкәртелү өчен Зәй элеваторына озатыла.

Без барганда Банки Сукаеш авылы басуында 5 “Нью Холланд” комбайны көнбагыш суктыра иде. Штурвал артында – яшьләр, шәһәр егетләре. Айнур Сәлахов ярдәмчесе Илфат Газизов белән соңгы гектарларга керешкән. Айнурга 30 яшь, комбайнда икенче сезон эшли. Илфатка – 19, быел төзелеш техникумын тәмамлаган егетнең уракта беренче тапкыр катнашуы икән.

– Эш ошый. Ардыра әлбәттә, әмма түзәрлек. Акчасын да вакытында түлиләр, ник эшләмәскә?! – ди Илфат.

Күренеп тора – тырыш егетләр. Әңгәмәне дә тимер атларны сүндермичә генә кордылар да, янә эшкә керештеләр. Әйе, озаклап сөйләшер вакыт түгел хәзер: һәр аяз көннән нәтиҗәле файдаланып калырга кирәк.

#Азнакай #Маяк

Сәхифәләр

Азнакайда шәһәр егетләре көнбагыш суктыра