Җәмгыять 3 май 2018 08:00

Азнакайда сафка тезелү һәм хәрби җыр бәйгесе узды

Күчмә кубокны унынчы ел рәттән Азнакай 2 нче урта мәктәбе командасы яулады.

Скопировать ссылку

(Азнакай, 3 май, "Татар-информ", "Маяк", Резеда Шәрипова). Җиңү бәйрәме алдыннан Азнакай мәктәпләренең өлкән сыйныф укучылары арасында педагог Сергей Махонин истәлегенә сафка тезелү һәм хәрби җыр бәйгесе уздыру күркәм традициягә әверелде, дип яза район газетасы.

Тантаналы марш белән атлау, хәрби комиссарга рапорт бирү, командаларны төгәл үтәү – Татарстан мәйданында быел да 10 мәктәп командасы оешканлыкта, бердәмлектә һәм вокал буенча осталыкларын күрсәттеләр. Һәр мәктәпнең үз формасы булу чарага тагын да тантаналы төсмер өстәде.

– Тиздән Җиңү бәйрәме җитә. Без бүген тыныч тормышта яшибез һәм моның өчен әби-бабаларыбызга рәхмәтлебез. Илебез армиясенең үткәне данлы һәм киләчәге дә шундый булыр дип ышанабыз. Сез – булачак Ватан сакчылары, – дип смотрда катнашучыларны сәламләп, муниципаль район башлыгы Марсель Шәйдуллин командаларны әзерләгән тормыш иминлеге нигезләре дәресен укытучыларга рәхмәтен җиткерде.

Күчмә кубокны унынчы ел рәттән Азнакай 2 нче урта мәктәбе командасы яулады.

– Ел саен состав үзгәреп тора, шуңа күрә әзерлек җиңел бирелми. Район хакимияте мәктәпләргә махсус формалар бүләк итте, иң яхшы команда буларак, безгә диңгезчеләр формасын бирделәр, укучылар бик яратты, – ди укытучы-оештыручы Марат Сабуров.

Смотрда икенче урынга – 7 нче мәктәп, өченче урынга 4 нче лицей лаек булды. Шулай ук иң яхшы командирларны да билгеләделәр. Җиңүчеләргә бүләкләр тапшырылды.

– Әлеге чара яшь буында патриотизм, коллективизм тәрбияләүгә, хәрби алымнарны өйрәтүгә юнәлдерелгән. Елдан-ел укучыларның әзерлек дәрәҗәсе арта, – диде Азнакай хәрби комиссары Рәдиф Камалиев.

#Азнакай #Маяк

Сәхифәләр

Азнакайда сафка тезелү һәм хәрби җыр бәйгесе узды