Дин 30 гыйнвар 2017 15:38

Азнакайда иң яхшы Коръән укучыны хаҗга юллама белән бүләклиләр

Азнакай шәһәренең мәдәният сараенда ир-атлар арасында Коръән уку буенча бәйге үтә.

Скопировать ссылку

(Казан, 30 гыйнвар, «Татар-информ»). 4 февральдә Азнакай шәһәренең мәдәният сараенда Татарстан мөселманнары Диния нәзарәте, төбәкнең көньяк-көнчыгыш казыяте, Азнакай районы хакимияте, Азнакай районы мөхтәсибәте, Шакировлар гаиләсе ир-атлар арасында Коръән уку буенча бәйге үткәрә. Бу хакта Татарстан мөселманнары Диния нәзарәте матбугат хезмәте хәбәр итә.

Бәйгенең символик исеме «Әсләм» һәм бу юкка гына түгел. Бәйгене әтиләре – озак еллар район үсешенә үз өлешен кертеп килгән эшмәкәр, милли көрәш буенча спорт остасы Әсләм Шакиров истәлегенә уллары үткәрә.

2013-2016 елларда бертуган Шакировлар милли көрәш буенча республика турнирлары үткәреп килде. Быел инде спортчылар түгел, ә дини мәйданда изге Коръән белгечләре үз осталыкларын күрсәтәчәк.

Беренче урынны яулаучыга бүләк – Хаҗга юллама, икенче урын иясенә — Өмрә, ягъни кече хаҗга юллама. Бәйгедә катнашу өчен 23 район гариза биргән инде, катнашучылар арасында балалар һәм мәдрәсә шәкертләре дә булачак.

#Азнакай #Коръән

Сәхифәләр

Азнакайда иң яхшы Коръән укучыны хаҗга юллама белән бүләклиләр