Азнакайда чәчүгә әзерлеккә уңай бәя бирделәр
Азнакай районы игенчеләренең язгы чәчүгә әзерлеге тикшерелде.
(Азнакай, 12 апрель, “Татар-информ”, “Маяк”, Резеда Шәрипова). Кичә республика Авыл хуҗалыгы һәм азык-төлек министрлыгы вәкилләре катнашында Азнакай районы игенчеләренең язгы чәчүгә әзерлеге тикшерелде. Бу турыда җирле басма хәбәр итә.
– Азнакайда техника яхшы әзерләнгән, көчле егәрле тракторлар, орлык чәчелешен контрольдә тоту системасы булган чәчү комплекслары күп. Башка районнардан аермалы буларак, җир дә алданрак кардан ачылган, механизаторлар тырмалау эшләренә керешкәннәр, – диде министрлыкның әйдәп баручы киңәшчесе Илнур Гарипов.
Ул районның язгы кыр эшләренә әзерлегенә уңай бәя бирде.
Ул механизаторларга рәхмәтен белдереп, язгы чәчүне вакытында һәм техника куркынычсызлыгы кагыйдәләрен саклап, исән-имин башкарып чыгуларын теләде.